Дар арафаи Рӯзи Конститутсия истеҳсоли сементи ватанӣ ба беш аз 1 млн. тонна расонида шуд

Душанбе, 5.11.2015. (АМИТ «Ховар»).-Имрўз бахшида ба Рўзи Конститутсияи (Сарқонуни) Ҷумҳурии Тоҷикистон дар Вазорати саноат ва технологияҳои нави Ҷумҳурии Тоҷикистон ҷамъомади тантанавӣ баргузор гардид. Вазири саноат ва технологияҳои нави  Ҷумҳурии Тоҷикистон  Шавкат Бобозода иштирокчиёни ҷамъомад ва меҳмононро бо Рўзи Конститутсия табрик гуфт. 
Зикр гардид, ки  кормандони вазорат,  корхонаву муассисаҳои соҳавӣ ҷиҳати  татбиқи Сарқонун дар фаъолият ва ҳаёти рӯзмарраи худ ва аз ин тариқ,  баҳри баланд бардоштани нишондиҳандаҳои истеҳсолӣ, рушди соҳаҳои иқтисодиёти кишвар ва баланд бардоштани сатҳи некуаҳволии мардуми кишвар саҳм хоҳанд гузошт.
Дар арафаи таҷлили 21-солагии Конститутсияи Ҷумҳурии Тоҷикистон ҳаҷми истеҳсоли сементи ватанӣ ба 1 млн. 240  тонна ва  истихроҷи ангиштро ба 885 ҳазор тонна расонида шуд, ки ин нишондод нисбат ба ҳамин давраи соли 2014 мутаносибан 140 ҳазор тонна семент ва 183 ҳазор тонна ангишт зиёд мебошад, ки ин дастоварди таърихии саноати мамлакат туҳфаи арзандае ба мардуми кишвар арзёбӣ мегардад.
Гуфта шуд, ки Конститутсия — чун сарчашмаи қонунгузории миллӣ ва давлати мо паҳлуҳои асосии ҳаёти ҷомеаро фаро гирифта, эътибори ҳуқуқӣ дорад ва меъёрҳои  он мустақиман амал намуда, давлат, ҳамаи мақомоти он, шахсони мансабдор, шаҳрвандон ва иттиҳодияҳои онҳо вазифадоранд, ки Конститутсия ва қонунҳои  ҷумҳуриро риоя ва иҷро намоянд.
Инчунин бахшида ба Рўзи Конститутсияи (Сарқонуни) Ҷумҳурии Тоҷикистон аз ҷониби вазорат ба тарбиятгирандагони Муассисаи давлатии «Литсей-интернати касбии махсуси маъюбон»-и шаҳри  Душанбе  кумакҳои моддию молиявӣ  расонида шуданд. 
Дар хатми ҷамъомад як гурӯҳ кормандони фаъоли вазорат,  корхонаҳои соҳа бо Ифтихорномаи Вазорати саноат ва технологияҳои нави Ҷумҳурии Тоҷикистон сарфароз гардонида шуданд.