Китоби «Маориф-гарави пешравии ҷомеа» аз чоп баромад

Душанбе, 24.11.2015. (АМИТ «Ховар»).-Бо ибтикори Ташкилоти ҷамъияти байналмилалии Бунёди  «Диалоги Авруосиё» китоби «Маориф-гарави пешравии ҷомеа» аз чоп баромад. Муаллифони китоб Ҷ.Ҷӯрабоев, А.Кӯчаров, С.Муллоҷонов ва  А.Сайфуллоев  буда, он  аз ҷониби  нашриёти «Маориф» ба табъ расидааст. 
Дар китоб андеша ва ақидаҳои чаҳор нафар фарзандони бузургу фарзонаи халқи тоҷик-Аҳмадмахдуми Дониш, Садриддин Айнӣ, Бобоҷон Ғафуров ва Мирзо Турсунзода бобати мактабу маориф ва нақшу ҷойгоҳи он дар ҷомеа дарҷ ёфтаанд. Мақолаҳои китоби мазкур масъалаҳои рушди мактабу маориф-аз даврони зуҳури он то замони имрӯзаро баррасӣ карда, талошу мубориза ва ғайрату ҷонбозиҳои равшанфикрон, маорифпарварон, мактабдорон ва шоиру нависандагони мутафаккирро дар ин масир нишон медиҳанд.