Конститутсия, Парчам, Нишон ва Суруди миллӣ- рамзҳои асосии давлатанд

Душанбе, 13. 11. 2015. (АМИТ «Ховар»).- Бахшида ба Рӯзи Парчами давлатии ҶТ дар Донишкадаи политехникии Донишгоҳи техникии Тоҷикистон ба номи академик Муҳаммад Осимӣ чорабинии идона бо иштироки устодону донишҷӯён доир гардид.
Дар чорабинӣ муовини директор оид ба таълим Хуршед Мақсудов гуфт, ки мутобиқи Конститутсияи Ҷумҳурии Тоҷикистон Парчам, Нишон ва Суруди миллӣ рамзҳои асосии давлат мебошанд.
Дар таърихи нави инсоният ин се падидаи ҷамъияти инсонӣ нишонаи соҳибихтиёрӣ ва соҳибистиқлолии ҳар як давлату миллат ба ҳисоб мераванд.
Мудири шуъбаи кор бо занони Кумитаи иҷроияи  ҲХДТ дар вилояти Суғд Ҳамроҳ Атаева баргузории чорабинии мазкурро нишонаи баланди ватандорӣ ва эҳсоси худшиносии ҷомеаи меҳнатии донишкада номида, зикр кард, ки ба туфайли меҳнати созанда ва идроки сиёсии баланди шаҳрвандони вилоят имрӯз сафи ҳизбиён ба 70 ҳазор нафар расида, алҳол раванди қабул ба узвият дар аксари корхонаву ташкилот хуб ҷараён дорад. Ӯ аз ҷумла гуфт, ки ҳизбиёни ташкилоти ибтидоии ба номи Муҳаммад Осимӣ дар ҳар чорабинии ҳизбӣ фаъолнокии бештар зоҳир намуда, мекӯшанд ҳадафҳои барномавии ҳизбро ҳамвора бо барномаҳои Вазорати маориф ва илми Ҷумҳурии Тоҷикистон дар амал татбиқ созанд.
Дар ҷамъомад ба 50  устоди лаёқатманду фаъоли донишкада билетҳои ҳизбӣ супорида шуданд.