Намоиш-фурўши техника ва мошинолоти кишоварзӣ дар ноҳияи А. Ҷомӣ

Душанбе, 18.11.2015. (АМИТ «Ховар).-Дар ноҳияи Абдураҳмони Ҷомӣ намоиш-фурўши техника ва дигар мошинолоти кишоварзӣ, ки истеҳсоли корхонаҳои ватанию хориҷӣ мебошанд, баргузор гардид. Дар намоишгоҳ наздики 20 навъи техникаи муосири хоҷагии қишлоқ ба маъраз гузошта шуд. 
Муовини якуми раиси вилоят Қурбон Ҳакимзода оид ба аҳамияти истифодаи техника дар соҳаи кишоварзӣ гуфт, ки мақсади чорабинӣ  дар сатҳи баланд ба роҳ мондани хизматрасонӣ ва таъмин намудани хоҷагиҳои кишоварзии вилоят бо техникаю таҷҳизоти замонавӣ мебошад. 
«Намоиш-фурӯши техника ва мошинолоти кишоварзиро Корхонаи воҳиди давлатии ҷумҳуриявии «Тоҷикагролизинг» баргузор кардааст ва алоқамандон метавонанд дар баробари харидории техника, ҳамчунин баъзе намудҳои онро ба иҷора бигиранд», — афзуд муовини якуми раиси вилоят. 
Дар доираи намоиш-фурӯш машварати вилоятӣ дар мавзӯи «Таъсис ва муҷаҳҳаз намудани марказҳои хизматрасонии техникӣ» доир гардид. КВД «Тоҷикагролизинг» дар ноҳияи Абдураҳмони Ҷомӣ намояндагии худро оид ба хизматрасонии техникӣ таъсис додааст ва намояндагони хоҷагиҳои деҳқонии вилоят метавонанд барои дарёфти маълумот ва машварат оид ба харид, иҷора ва истифодаи техникаи кишоварзӣ ба ин муассиса муроҷиат намоянд.