Парчами давлатӣ нишон аз ғановату асолати таърихиву фарҳангии миллати тоҷик аст

Душанбе, 24.11.2015. (АМИТ «Ховар»).-23 ноябр дар Вазорати маориф ва илми Ҷумҳурии Тоҷикистон бахшида ба Рӯзи парчам чорабинӣ доир гардид. 
Дар ҷамъомад вазири маориф ва илм Нуриддин Саид иброз дошт, ки Парчами миллии мо нишон аз таърихи чандинҳазорсолаи халқи тоҷик буда, мардуми ин сарзамин дар ҳар давраи таърихӣ маҳз зери Парчами миллии худ ба ваҳдату ягонагӣ ва пешрафту шукуфоӣ расидаанд. 
Муовини аввали вазири маориф ва илм Раҳматулло Мирбобоев ва сардори раёсати илм ва инноватсияи вазорат Хуршед Зиёев афзуданд, ки Парчами давлатӣ баёнгари ҳаққи мавҷудияти миллати соҳибдавлати тоҷик бо тамоми  ғановату асолати таърихиву фарҳангӣ ва ҳуқуқии он аст. Дар Парчами кишвари мо даъват ба иттиҳоду  сарҷамъӣ, нангу номус, ватандӯстиву ватанпарастӣ, ҳимояи марзу бум, саъю талош барои эътимори ҷомеаи адолатпарвар ва инсонияту башардӯстии миллати мо таҷассум гардидааст.