Пулиси Фаронса шарики тахминии террористонро ҷавоб дод

Душанбе, 16.11.15. (АМИТ «Ховар»). — Пулиси  Фаронса  шарики  гумонбари  террористон  Солеҳ Абдулсаломро, ки автомобили  тамғаи Volkswagen — и онҳоро киро гирифта  буд,  дастгир  намуд. 
Солеҳро  дар  сарҳад,  ҳангоми кӯшиши тарк  намудани  кишвар  дастгир  намуда, вале  баъди  тафтиши  ҳуҷҷатҳояш  ӯро  ҷавоб  доданд, хабар  медиҳад  Агентии  «Ассошиэйтед пресс».
Баъдтар   маълум  гардид, ки  ду  бародари  Абдусалом  аз  ҷумлаи иҷрокунандагони  амалиётҳои террористӣ  дар  шаҳри  Париж  будаанд. Якеаш  худро  дар  маркази  шаҳр  тарконида,  дуюмашро  дар  Белгия  дастгир  карданд. 
Маҳалли  будубоши  Солеҳ  Абдусалом  маълум  набуда,   дар ҷустуҷӯи  байналмилалӣ  қарор  дорад. 
Бино  ба  маълумоти  манбаъ, аз ҷумлаи 7 нафар  силоҳбадасти  13  ноябр  дар   Париж  ҳалокгардида ду  нафарашон  шаҳрвандони Фаронса буда,  дар  Брюссел  зиндагӣ  мекардаанд. Дар  ин  шаҳр  ҳафт  нафар  бо  гумонбари  амалиёти террористӣ  дастгир  шудааст.
Ёдовар  мешавем, ки  шоми  13  ноябр дар  шаҳри  Париж  якчанд  амалиёти террористӣ  рух дода,  бар  асари онҳо  129  нафар  ҳалок гардида,  беш  аз  320  нафар  осеб  дид.