Шӯрои амнияти СММ оид ба мубориза бо «ДИ» ва «Ал-Қоида» қатънома қабул кард

Душанбе, 21.11.2015 (АМИТ «Ховар»). -Шӯрои амнияти Созмони Милали Муттаҳид қатъномаи омода намудаи Фаронсаро оид ба ҳамоҳангсозии мубориза бар зидди террористони гурӯҳи «Давлати исломӣ» ва «Ал-қоида» қобили қабул донистааст. Дар ин бора хабаргузории РИА Новости иттилоъ медиҳад.
Санади мазкур аз тарафи ҳамаи 15 аъзои Шӯрои амният дастгирӣ ёфт. Санад аз давлатҳои узви СММ, ки имконият доранд, даъват мекунад, ки ҳамаи тадбиру чораҳои ба ҳуқуқи байналмилал мувофиқро амалӣ карда, мубориза ба муқобили гурӯҳҳои калони ифротии ДИИШ ва «Ҷабҳат-ан-Нусра»-ро тақвият бахшида, онро ҳамоҳанг гардонанд, то ин ки содиршавии амалҳои террористӣ бартараф  шавад.
Қатънома гурӯҳи «Ҷабҳат-ан-Нусра» ва ҳама гурӯҳҳои дигари бо «Ал-қоида» робитадоштаро ҳамчун хатар ба субот ва амнияти байналмилалӣ муаррифӣ карда, даъват мекунад, ки лонаи террористон, ки дар ҳудудҳои Ироқ ва Сурия бунёд шудааст, несту нобуд карда шавад. Дар қатънома амалҳои террористие, ки гурӯҳи «Давлати исломӣ» 26-уми июн дар шаҳри Суссеи Тунис, 10-уми октябр дар Анқара, 31-уми октябр дар ҷазираи Синай, 12-уми ноябр дар Бейрут ва 13-уми ноябр дар Париж содир карданд, шадидан маҳкум гардида, ба шаҳрвандон ва ҳукумати Тунис, Туркия, Русия, Лубнон ва Фаронса изҳори тасаллият баён шудааст.