Аҳамияти кортҳои пластикӣ дар даврони муосир

Душанбе, 5.12.2015(АМИТ «Ховар»).- 3 декабр дар Донишкадаи молия ва иқтисоди Тоҷикистон дар мавзӯи «Аҳамияти кортҳои пластикӣ дар даврони муосир» семинари илмию амалӣ доир гардид.
Дар семинар мудири кафедраи фаъолияти бонкӣ Ҳакимбек Сандалов иброз дошт, ки пардохт намудани маблағҳои гуногун тавассути кортҳои пластикӣ дар тамоми бонкҳо  талаби замон аст.
Муаллими калони ҳамин кафедра Ғ. Ғафуров  дар мавзӯи мавриди назар маърӯза намуда, аз таърихи пайдоиши корти пластикӣ ҳарф зад. Мавсуф зикр кард, ки корт метавонад ҳамчун иҷозатнома барои ворид шудан ба бино, воситаи дастрасӣ ба компютер, воситаи пардохти ҳаққи гуфтугӯйи телефон ва шаҳодатномаи ронандагӣ хизмат кунад. Дар соҳаи муомилоти пулӣ кортҳои пластикӣ яке аз воситаҳои пешқадами ташкил намудани ҳисобҳо ғайринақдӣ мебошанд. Рушди бозори кортҳои пардохтӣ дар ҷумҳурии мо низ яке аз омилҳои муҳимтарини ҳалли масъалаи кам кардани ҳиссаи ҳисоббаробаркуниҳо бо пули нақд ва рушди ҳисоббаробаркуниҳои ғайринақдӣ дар соҳаи пардохтҳои чакана ба ҳисоб меравад, гуфт Ғ. Ғафуров.
Дар семинар миёни устодону донишҷӯён саволу ҷавоб сурат гирифт ва роҷеъ ба ин масъала онҳо ҷавобҳои мушаххас гирифтанд, ки барои тавсеаи донишашон мусоидат мекунад.