Ҷаласа дар ҳузури Сарвазири мамлакат оид ба корҳои соҳилмустаҳкамкунӣ

Душанбе, 24.12.2015 (АМИТ Ховар).- Имрӯз дар ҳузури Сарвазири мамлакат Қоҳир Расулзода бо иштироки роҳбарони як қатор вазорату кумитаҳо, идораҳои давлатӣ ва роҳбарони лоиҳаҳо вобаста ба вусъат додани корҳои соҳилмустаҳкамкунӣ ва тадбирҳои мушаххас оид ба пешгирии хатарҳои офатҳои табиӣ ҷаласа баргузор шуд.
 Дар ҷаласа оид ба иҷрои дастуру супоришҳои роҳбарияти давлату ҳукумати ҷумҳурӣ ва вобаста ба вусъати корҳои соҳилмустаҳкамкунӣ маълумоти директори Агентии беҳдошти замин ва обёрии назди Ҳукумати Ҷумҳурии Тоҷикистон, инчунин роҳбарони лоиҳаҳо шунида шуд.
 Иттилоъ дода шуд, ки аз 1386 километр саддҳои муҳофизатӣ беш аз 600 километри он корношоям гардидааст ва ба таври зарурӣ нигоҳ доштани онҳо хароҷоти зиёд талаб мекунад, зеро ҳар сол онҳо бар асари офатҳои шадиди табиӣ осеб мебинанд. Чунонки иттилоъ доданд, вазъи мураккаб бештар дар ҳавзаҳои дарёҳои Панҷ, Вахш, Зарафшон ва Сурхоб ба мушоҳида мерасад. 
 Сарвазири мамлакат Қоҳир Расулзода аз ҷараёни ҷамъоварии ҳаққи истифодаи об, ки аз 71 миллиони нақша, танҳо 36 миллиону 715 ҳазор сомонӣ иҷро шудааст, изҳори нигаронӣ кард ва афзуд, ки яке аз омилҳои асосии қафомонии корҳо пурра пардохт накардани маблағ аз тарафи истифодабарандагони об мебошад.
 Дар ҷаласа бори дигар ба самъи ҳозирин дастуру супоришҳои Сарвари давлат Эмомалӣ Раҳмон доир ба омодасозии лоиҳаю  нақшаҳои асоснок барои пешгирии оқибатҳои селу обхезӣ ва дигар офатҳои табиӣ расонда шуд.
 Бо назардошти масъалаҳои дар ҷаласа муҳокимагардида, Сарвазири мамлакат Қоҳир Расулзода роҳбарони  вазорату идораҳои дахлдор  ва дигар масъулини соҳаро вазифадор намуд, ки доир ба ҷоннок кардани корҳо ва бартарафсозии камбудию нуқсонҳои мавҷуда, таҳияи нақшаву лоиҳаҳои мукаммал барои фаъолият дар соли 2016-ум, захираи масолеҳи сохтмонӣ, маводи сӯзишворӣ, истифодаи мақсадноки маблағҳои давлатию грантҳо, ҷалби сармояи хориҷӣ барои вусъати корҳои соҳилмустаҳкамкунӣ, инчунин таъмини техникаҳои зарурӣ аз ҳозир тадбирҳои таъхирнопазир андешанд.