Ҷамъияти тоҷикони вилояти Свердловск: Эмомалӣ Раҳмон — Пешвои миллати тоҷик аст

Душанбе, 15.12.2015. (АМИТ «Ховар) —  Дар шаҳри Екатеринбурги Федератсияи Русия бо иштироки намояндагони ҷамъиятҳои «Сомон», «Дидор», «Иттифоқи тоҷикони Русия» ҷаласаи Шӯрои ҳамоҳангсози ҷамъиятҳои тоҷики шаҳри Екатеринбург бахшида ба қабули Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ — Пешвои миллат» баргузор гардид.  Роҳбари Шӯрои ҳамоҳангсозии ҷамъиятҳои тоҷики шаҳри Екатеринбург Фаррух Мирзоев гуфт, ки қонуни мазкур, ки бо ташаббуси як гурўҳ вакилони мардумӣ ва дархости кулли шаҳрвандони мамлакат пешниҳод ва қабул гардид,  эҳтиёҷи миллии мардуми Тоҷикистон мебошад. Президенти кишвар Ҷаноби Олӣ мўҳтарам Эмомалӣ Раҳмон дар лаҳзаҳои тақдирсоз масъулияти бузургро  ба дӯш гирифта,  Тоҷикистон ва мардуми онро аз вартаи  нестшавӣ наҷот дод ва месазад, ки ӯро Пешвои миллат гӯем. Иштирокдорони ҷаласа бо гуфтаҳои Мирзоев Ф.М. якдилии худро изҳор намуданд. Онҳо зикр карданд, ки то қабул гардидани Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ — Пешвои миллат» ҳам муҳтарам Эмомалӣ Раҳмонро пешвои миллати тоҷик дар тамоми дунё меҳисобиданд ва бо ба тасвиб расидани ин қонун андешаву ормонҳои онҳо дар ин маврид қонунӣ гаштанд.