Аз 834 довталаби кор дар мақомоти агентӣ 71 нафар аз озмун гузашт

Душанбе, 15.12.2015 (АМИТ «Ховар»).  Агентии назорати давлатии молиявӣ ва мубориза бо коррупсияи Ҷумҳурии Тоҷикистон бори аввал бо ҷалби коршиносон ва мутахассисони Маркази миллии тестии назди Президенти мамлакат қабули санҷиши довталабонро барои ишғоли вазифаҳои холии агентӣ ба таври тестӣ анҷом дод.  Ҳадаф аз баргузории озмуни шаффоф ва холисонаю воқеъбинона таъмини баробарҳуқуқии шаҳрвандон ба хизмати давлатӣ, интихоб ва ҷобаҷогузории кадрҳои баландихтисос ва салоҳиятнок буд. 
Барои ишғоли мансабҳои холии агентӣ моҳи августи соли равон тавассути ВАО ва Агентии хизмати давлатӣ озмун эълон шуд, ки дар он 834 шаҳрванд хоҳиши иштирок кардан намуд. Аз ин теъдод 71 нафар аз озмун гузашт ва то моҳи ноябри соли равон 67 нафари онҳо дар мақомоти агентӣ ба вазифаҳо таъйин шуданд.
Дар ин бора аз маркази матбуоти Агентии назорати давлатии молиявӣ ва мубориза бо коррупсияи Ҷумҳурии Тоҷикистон хабар доданд.