Башор Асад: Ҳамлаҳои Англия ва Фаронса бефоидаанд

Душанбе, 7.12.2015. (АМИТ “Ховар”). -Раиси ҷумҳурии Сурия ҳамлаҳои Англия ва Фаронсаро бефоида донист ва гуфт, ин кишварҳо барои мубориза бо терроризм ирода надоранд.
Башор Асад дар мусоҳибае бо «Сандей Таймз» гуфт, ин иқдоми ғайриқонунӣ танҳо боиси  густариши «ғадуди саратонӣ»- терроризм дар минтақа  мегардад.
Асад афзуд: «Англия ва Фаронса аз ҳамон ибтидои даргириҳо ҳимоятгари терроризм буданд».
Вай хотирнишон кард, ки ин ду кишвари аврупоӣ «аз дарки дуруст дар бораи чӣ гуна шикаст додани ДИИШ» бархурдор нестанд.
Башор Асад бо баёни ин, ки эътилофи таҳти роҳбарии Амрико сохта аст, афзуд : «Ин эътилоф ҳеҷ муваффақияти назаррасе надоштааст ва бо ҳамин сабаб Сурия вақти худро бо баҳс дар бораи иқдоми ин масъала талаф намекунад ва ба мубориза бо терроризм идома медиҳад».