Чаппа шудани воситаҳои нақлиёт

Душанбе, 17.12.2015. (АМИТ «Ховар) — Ронандаи мошини тамғаи “Опел-Астра”, сокини 55-солаи ноҳияи Н.Хусрав рӯзи  16 декабри соли равон, ҳангоми ҳаракат аз маркази ноҳия ба самти ноҳияи Шаҳритус, дар ҳудуди деҳаи Комсомол аз уҳдаи идораи воситаи нақлиёт набаромада, ба тарафи рости роҳ чаппа шудааст. Дар натиҷа худи ронанда ҷароҳати вазнини ҷисмонӣ бардошта, дар беморхона ба ҳалокат расидааст. 
Ҳамчунин дар ин рӯз ронандаи мошини тамғаи “ВАЗ-21014”, марди 25- солаи сокини шаҳри Душанбе ҳангоми ҳаракат аз кӯчаи Ҷ.Расулов ба самти кӯчаи Шамсӣ, дар ҳудуди кӯчаи Б.Ғафурови пойтахт аз уҳдаи идораи воситаи нақлиёт набаромада, чаппа шудааст. Дар натиҷа мусофираш, сокини 25-солаи пойтахт ҷароҳати вазнини ҷисмонӣ бардошта, дар беморхона ба ҳалокат расидааст.