Директори Боғи ҳайвоноти Душанбе: Байни «Амур» ва «Темур» дӯстӣ боқӣ намемонад

Душанбе, 08.12.15. (АМИТ «Ховар»). —  «Ҳайвонҳое, ки дар Боғи ҳайвонот нигоҳ дошта мешаванд, аз ҳайвонҳое, ки дар ҷангалзор зиндагӣ мекунанд, ба куллӣ фарқ доранд. Яъне, ҳайвонҳои Боғи ҳайвонот тайёрхӯр, ба истилоҳ «паразит» мебошанд. Аз ин рӯ ҳиссиёти даррандагии ҳайвонҳои ваҳшӣ суст мегардад. Барои он, ки ҳиссиёти дарандагии ҳайвон гум нашавад, ба онҳо  аз тарафи кормандони боғи ҳайвонот тӯъмаи зинда  дода мешавад, то онҳо ҳиссиёти худро барқарор кунанд», — гуфт директори Боғи ҳайвоноти шаҳри Душанбе Қурбон Одинаев доир ба воқеаи аҷибе, ки ҳафтаи гузашта расонаӣ шуда, дӯстии байни паланг «Амур» ва буз «Темур»-ро бозгӯӣ мекард.
Ёдовар мешавем, ки дар боғи Сафарии канораи Приморияи Русия палангу буз чанд рӯз аст, ки якҷоя  зиндагӣ доранд. Директори боғи Сафари Дмитрий Мезенсев гуфтааст, ки: «Мо ду бор дар як ҳафта ба палангон  тӯъмаи зинда медиҳем.  Паланг Амур, ки борҳо бузғолаву бузҳои калонро кушта буд, ин дафъа бо эҳтиёт ба ин тӯъмааш муносибат кард. Ин буз хеле ҷасур буда, ба ҳар ҳуҷуми Амур шохҳояшро нишон дода, ҷавобан ҳамла мекард.   Паланги эҳтиёткорро ин кори буз ба изтироб овард ва нахост дигар бо бузи якрав сар ба сар шавад ва аз баҳраш гузашт”.
Ҳамчунин вобаста ба ин воқеа  директори Боғи ҳайвоноти шаҳри Душанбе Қурбон Одинаев гуфт, ки ҳеҷ вақт байни ин гуна ҳайвонот дӯстӣ боқӣ намемонад ва рӯзе эҳсоси  дарандагии  паланг бедор шуда, ӯ зарари худро ба буз мерасонад.