М.Ҷабборӣ: Табиат боз моро имтиҳон намуда, барои азму талоши зиндагӣ ва масъулиятнокию корнамоӣ бедор сохт

 Душанбе, 15.12.2015. (АМИТ «Ховар»). — “Чорабинии имрӯза дар марҳилаи ниҳоят ҷиддӣ, тақдирсанҷ ва ҳассоси сиёсию иҷтимоӣ, ки ҳодисаҳои охирини фавқулоддаи заминларзаро дар як силсила минтақаҳои мамлакат инъикос мекунад, гузашта истодааст. Табиат боз моро имтиҳон намуда, барои азму талоши зиндагӣ, сарҷамъию муттаҳидӣ, дилсӯзӣ ва масъулиятнокию корнамоӣ бедор сохт.  Соҳаи ҳифзи солимии аҳолӣ аз самтҳои афзалиятноки рушди иқтисодиёти давлат ба шумор рафта, он  дар панҷ соли охир ба дастовардҳои назаррас ноил гаштааст, ки ин аз сиёсати хирадмандонаи Сарвари давлат вобаста ба масъалаҳои тандурустӣ ва ҳифзи иҷтимоии аҳолӣ шаҳодат медиҳад”,-гуфт муовини Сарвазири ҷумҳурӣ Марҳабо Ҷабборӣ зимни ҷамъбасти натиҷаҳои фаъолияти соҳаи тандурустӣ дар доираи амалисозии “Стратегияи миллии солимии аҳолии Ҷумҳурии Тоҷикистон барои  солҳои 2010-2020”. 
Тавре ки қаблан иттилоъ додем, имрӯз,  15 декабр дар Душанбе ҷамъбасти натиҷаҳои фаъолияти соҳаи тандурустӣ дар доираи амалисозии “Стратегияи миллии солимии аҳолии Ҷумҳурии Тоҷикистон барои  солҳои 2010-2020”, ки бо қарори Ҳукумати Ҷумҳурии Тоҷикистон соли 2010 тасдиқ гардидааст,  Шарҳи якҷояи соли панҷум ва миёнамуҳлати татбиқи Стратегияи мазкур (САММИТ — 5) баргузор шуд. 
Дар ҳамоиш намояндагони Маҷлиси намояндагони МО Ҷумҳуриии Тоҷикистон, роҳбарияти вазорати тандурустӣ ва ҳифзи иҷтимоии аҳолӣ, роҳбарони сохторҳои тандурустии шаҳру вилоятҳо ва муассисаҳои ҷумҳуриявии кишвар, профессорону устодони соҳаи тиб, намояндагони Ташкилоти Умумиҷаҳонии тандурустӣ,намояндагони дигар вазорату идораҳо, ҳамкорон оид ба рушд ва ташкилоти ғайридавлатӣ иштирок намуданд. 
       “Бояд ёдовар шуд, ки соли 2015  бо иқдоми бевоситаи Президенти кишвар “Соли оила” эълон гардида, барои мустаҳкам намудани институти оила, муносибатҳои байни навҷавонони оиладор, рушди хизматрасонии тиббию иҷтимоии модарону кӯдакон, тарғибу ташвиқоти тарзи ҳаёти солим, таъмини ҳуқуқҳои озодии инсон, адолати иҷтимоӣ, баробарҳуқуқӣ, ташаккули муносибатҳои байни шахсият, ҷомеа ва давлат такони ҷиддӣ дод. Маблағгузории давлатии соҳаи тандурустӣ дар зарфи 10 соли охир 25 баробар афзун гардида, ба ин васила муассисаҳои гуногуни ин соҳа бо техникаю таҷҳизоти муосири ташхису муолиҷа таъмин мегарданд ва сифати хизматрасонии тиббӣ рӯ ба беҳшавӣ овардааст”,-илова намуд Марҳабо Ҷабборӣ.