Машварат: «Амалия ва назарияи қонунгузорӣ дар соҳаи зиддиинҳисорӣ»

Душанбе, 11.12.2015. (АМИТ «Ховар»). Дар Хадамоти зиддиинҳисории назди Ҳукумати Ҷумҳурии Тоҷикистон машварати ҷумҳуриявӣ дар мавзўи «Амалия ва назарияи қонунгузорӣ дар соҳаи зиддиинҳисорӣ» баргузор гардид. Машварат бо иштироки роҳбарони сохторҳои давлативу ҷамъиятии соҳаҳои гуногуни кишвар, ки дар робита бо ҳимояи ҳуқуқи истеъмолкунандагон, рушди рақобат ва пешгирии фаъолияти инҳисорӣ дар бозори мол, татбиқи сиёсати инҳисории табиӣ ва соҳаи реклама  фаъолият менамоянд, ташкил гардид. 
Сардори Хадамот Саъдӣ Қодирзода иброз намуд, ки қонунгузории соҳаи зиддиинҳисорӣ ба хотири танзими муносибатҳои иқтисодӣ, пеш аз ҳама, муносибат ва ҳимояву ҳифзи манфиатҳои истеъмолкунандагон дар баробари истеҳсолкунандагон, иҷрокунандагон, фурӯшандагони молу маҳсулот, кору хизматрасонӣ ва инчунин назорати фаъолияти рекламавӣ, ки ҳамагӣ барои баланд бардоштани сифати зиндагӣ нигаронида шудааст, татбиқ мегардад.
Барои татбиқи қонунҳои Ҷумҳурии Тоҷикистон «Дар бораи ҳимояи ҳуқуқи истеъмолкунандагон», «Дар бораи рақобат ва маҳдудкунии фаъолияти инҳисорӣ дар бозорҳои мол», «Дар бораи инҳисории табиӣ» ва «Дар бораи реклама» ва иҷрои дастурҳои Ҳукумати Ҷумҳурии Тоҷикистон бобати ҳимояи ҳуқуқи истеъмолкунандагон дар миқёси ҷумҳурӣ 52 маркази машваратӣ таъсис шудааст, ки арзу муроҷиатҳои истеъмолкунандагонро оид ба масъалаҳои гуногуни ҳуқуқҳои истеъмолиашон баррасиву бартараф менамоянд. Аз ҷумла, вусъати фаъолият оид ба ташкили робитаи боз ҳам наздиктар бо истеъмолкунандагон ва татбиқи қонунгузориро дар сатҳу сифати нав муҳим арзёбӣ намуда, андешидани тадбирҳо ва роҳу усулҳои муосирро зарур арзёбӣ намуданд.  Дар машварат коршиносон, мутахассисони соҳаи зиддиинҳисорӣ, роҳбарони соҳаҳои иқтисодиёт, иҷтимоиёт, фарҳангу ҳуқуқ ширкат варзида, барои таъмини фаъолияти системавии сохторҳои марбута ва татбиқи қонунгузории зиддиинҳисорӣ, аз ҷумла маърифаткунонии истеъмолкунандагон андешаронӣ намуданд.
Кормандони масъули сохторҳои соҳаи тандурустӣ, маориф, савдо, кору хизматрасонӣ, ҳифзи муҳити зист, санитариву эпидемиологӣ, байторӣ ва дигар намудҳои хизматрасониҳо ба аҳолӣ роҳҳои беҳтаргардонии муносибатҳои хизматрасонӣ, сифати молу маҳсулот ва кору хизматрасониро баррасӣ намуданд.