Муҳокимаи масъалаи ҷамъ овардани қӯшунҳои Туркия дар сарҳади Ироқ дар Шӯрои амнияти СММ

Душанбе, 08.12.15. (АМИТ «Ховар»).  Имрӯз, 8  декабр, Русия  дар  машварати пӯшидаи Шӯрои  амнияти   СММ масъалаи  бе ризоияти  Бағдод  дар  шимоли  Ироқ ҷамъ  оварда шудани қувваҳои  ҳарбии  Туркияро  ба  миён  мегузорад.  Дар  баробари  ин,   тавре  ки манбаи  дипломатии СММ  ба ТАСС  хабар  дод, маълумот  дар  бораи  доир  намудани ин ҷаласаи   алоҳидаи  Шӯрои  амният ҳақиқат  надорад. 
«Ин тавр  нест. Масъала  дар машварати  пӯшида дар  фасли  масоили  дигар ба  миён  гузошта  мешавад», — гуфт  дипломат. Мавсуф  изҳор  дошт, ки  аз  рӯи  натиҷаи  машваратҳо   ягон қароре қабул  намешавад. Алҳол дар  намояндагии  доимии  Русия  дар СММ аз   шарҳу  мулоҳизаи  расмӣ  дар  мавриди  ин  масъала  худдорӣ  карданд. 
Аз ин  пеш,  4  декабр  гурӯҳи   низомиёни  Туркия  иборат  аз  қариб  130  хидматчии  ҳарбӣ  ва  танку  тупҳо гуё бо  мақсади  расонидани  ёрӣ  ба  дастаҳои «Пешмарга» — и ихтиёриёни  курд, ки зидди ҷангиёни ДИ ҳарбу  зарб  менамоянд,   вориди  қаламрави  Курдистони  Ироқ гардида буд.
Роҳбарияти  Ироқ ин  амали  ҳарбиёни  Туркияро «кирдори душманона» маънидод  кард, зеро он  бидуни  мувофиқа бо  Бағдод  сурат  гирифта буд.