Мувофиқаи Чину Тоҷикистон дар мавриди таҷҳизоти бахши пулис

Душанбе, 21.12.15. (АМИТ «Ховар»). — Вазорати   корҳои дохилии ҶТ  ва Вазорати амнияти ҷамъиятии ҶМЧ  дар  бораи  таъминот  бо  таҷҳизоти  мавриди  зарурати   пулис  дар  ҳошияи   расонидани ёрии  маҷҷонӣ   ба  Тоҷикистон  мувофиқа  намуданд.  Ҳуҷҷати дахлдорро  аз  рӯи  натиҷаи  гуфтушунид  вазири   корҳои дохилии  Тоҷикистон  Рамазон  Раҳимзода  ва  сафири  ҶМЧ  дар  Тоҷикистон  Юе  Бин  имзо  намуданд. 
Тавре  ки   маркази  матбуоти  ВКД хабар  медиҳад, ҷонибҳо  масоили   марбут ба ҳамкорӣ  дар  мубориза  бо ситезаҷӯиҳои   имрӯза,  аз  қабили  терроризм,  ифротталабӣ ва  сепаратизмро   мавриди  муҳокима  қарор  доданд. 
Зикр  шуд, ки  ҳамкории  миёни   мақомоти   ҳифзи  ҳуқуқи  ҳар  ду  кишвар дар  асоси   шартномаҳои  дуҷонибаю  бисёрҷониба   сол  аз  сол   рушд  ёфта,  ба  муборизаи   зидди  хавфу  хатар  ва  ситезаҷӯиҳои ҷаҳонии  имрӯза ба таври  судманд ёрӣ  мерасонад.