Намояндагони «Истиқлол» ва «Хуҷанд» дар семинари КФО иштирок менамоянд

Душанбе, 09.12.15. (АМИТ «Ховар»). –  Намояндагони клубҳои  футболи «Истиқлол» ва «Хуҷанд»  дар  семинари  маърифатии Конфедератсияи  футболи  Осиё, ки  аз  10  то 11  декабр дар  Малайзия  баргузор  мегардад, иштирок  менамоянд.
Дар  семинар  дастаи «Истиқлол» — ро Шаҳзод  Сулаймонов  (менеҷери  клуб) ва Рустам  Ҳакимов  (масъули бахши  матбуот) ва  дастаи «Хуҷанд» — ро Акбар Иброҳимов (менеҷери  клуб) ва Далер  Отабеков (масъули  бахши  матбуот)  намояндагӣ  мекунанд. 
Дар  доираи  семинар  ҳамчунин  маросими  қуръапартоии  марҳалаи гурӯҳии Ҷоми  КФО – 2016  баргузор  мегардад, ки дар  он  намояндагони  Тоҷикистон  ҳам  ширкат  мекунанд. 
Ёдовар  мешавем, ки  қаҳрамони  чоркаратаи  Тоҷикистон  дастаи  «Истиқлол» — и  пойтахт  қувваозмоии  худро  дар  сабқати  нави Ҷоми КФО  аз даври  гурӯҳӣ ва  дастаи «Хуҷанд» дар  қувваозмоӣ  барои  пайдо намудани роҳхат ба  марҳалаи  гурӯҳӣ  бо  клуби «Аҳли Ал –Халил»  оғоз  менамоянд.