Навбати киштиҳои зериобӣ расид

Душанбе, 09.12.2015. (АМИТ «Ховар). -Чанд соат пеш аз киштии зериобии «Ростов дар лаби Дон», мутааллиқ ба неруҳои ҳарбӣ-баҳрии Федератсияи Русия ба мавқеи ҷойгиршавии пойгоҳи гурӯҳи террористии ДИИШ дар ҳудуди Сурия ракетаҳои болдори навъи «Калибр» сар дода шуданд. Дар бораи ба амалиёти қувваҳои мусаллаҳи Русия бар зидди терроризми байналмилалӣ ворид шудани киштиҳои зериобӣ ва бори нахуст сар додани ракетаҳои болдори дурпарвоз аз баҳри Миёназамин ба хоки Сурия вазири мудофиаи Русия Сергей Шойгу шахсан ба Владимир Путин ҳисобот дод. 
Хотиррасон мекунем, ки аз моҳи сентябри соли равон қувваҳои мусаллаҳи Федератсияи Русия ба муқобили гурӯҳҳои террористӣ, ки дар ҳудуди кишварҳои Ироқ ва Сурия мавқеи устувор гирифтаву ҳукмронӣ доштанд, бо амалиёти махсус вориди ҷанг шуданд. Дар ибтидо 50 тайёра ва чархболҳои ҷангӣ ба пойгоҳҳои террористон зарбаҳо зада, сипас 7-уми октябр ва 20-уми ноябр аз киштиҳои ҷангии неруҳои ҳарбӣ-баҳрии Русия аз баҳри Хазар ба ҷониби Сурия 11 ракетаҳ болдор сар дода шуд.  
Умуман дар давоми бештар аз ду моҳи амалиёти неруҳои ҳарбӣ-ҳавоӣ ва ҳарбӣ-баҳрии Федератсияи Русия ба муқобили гурӯҳҳои терроризми байналмилалӣ зиёда аз 4 ҳазор маротиба ҳамлаҳо анҷом дода шуданд. Дар ин фурсат аз тарафи Русия як тайёраи Су-24 ва сарнишини он ва як ҷанговари пиёданизоми баҳрӣ ҳамчун талафот ба қайд гирифта шудааст.