Парлумони Тоҷикистон ба муҳокимаи тарҳи ниҳоии Қонун «Дар бораи асосгузори сулҳу ваҳдати миллӣ — Пешвои миллат» шурӯъ кард

Душанбе, 09.12.2015. (АМИТ «Ховар) -Имрӯз Маҷлиси намояндагони Маҷлиси Олии Ҷумҳурии Тоҷикистон ба муҳокимаи тарҳи ниҳоии Қонун «Дар бораи асосгузори сулҳу ваҳдати миллӣ — Пешвои миллат» оғоз кард. 
Шукурҷон Зуҳуров, раиси Маҷлиси намояндагон ин лоиҳаи қонунро «таърихӣ» ном бурд ва тасвибашро ба нафъи ҷомеа ва бахусус муттаҳидии сокинон донист. Ӯ гуфт, ки таҷрибаи эътирофи раҳбарон ва пешвоёни миллат дар кишварҳои дигари дунё низ вуҷуд дошта, «аз шинохт ва эътирофи онҳо демократия ва озодиҳояшон ҳеч осеб надидааст.»
Раиси Маҷлиси намояндагони Маҷлиси Олии мамлакат  дар идома гуфт, ки эътирофи Эмомалӣ Раҳмон ба ҳайси пешвои миллат ба маънои аз демократия сарфи назар кардани Тоҷикистон нест: «Дар шароити кунунӣ ба ин тасмими мо дӯстону душманон назарҳои мухталиф доранд. Аммо мо бояд дуруст дарк намоем, ки ин қонун на ба хотири шахсият аст. Эмомалӣ Раҳмон барои миллат ва ватани мо хизмати бузург кардааст. Ӯ ба ин эҳтиёҷ надорад, балки мардум ба ҳифзи ин дастовардҳо ниёз доранд.”