Садамаи нақлиётӣ: Як нафар ҳалок ва як нафар бистарӣ гардид

Душанбе, 10.12.2015. (АМИТ «Ховар) —9 декабри соли равон, ронандаи мошини тамғаи “Мерседес-Бенс”, сокини 31-солаи  ноҳияи Б.Ғафуров, ҳангоми ҳаракат бо кӯчаи Ленини шаҳри Хуҷанд, дар рӯ ба рӯи меҳмонхонаи “Эҳсон” аз уҳдаи идораи мошин набаромада, ба симчӯби канори роҳ бархӯрдааст. Дар натиҷа худи ронанда ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст ва мусофири мошини мазкур, сокини 31-солаи  ноҳияи Б.Ғафуров ҷароҳати ҷисмонӣ бардошта, дар беморхона бистарӣ гаштааст. 
Ҳамчунин дар ин рӯз, ронандаи мошини номаълум ҳангоми ҳаракат аз тарафи шаҳри Душанбе ба тарафи ноҳияи Қубодиён, дар ҳудуди деҳаи Меҳнатободи ноҳияи Хуросон, аз уҳдаи идораи мошин набаромада, пиёдагард, сокини 28-солаи деҳаи Меҳнатободро пахш намуда, аз ҷойи ҳодиса ғайб задааст. Дар натиҷа пиёдагард ҷароҳати ҷисмонӣ бардошта, дар беморхона бистарӣ гаштааст. Зимни гузаронидани чорабиниҳои фаврӣ-ҷустуҷӯӣ, ронандаи мошини тамғаи “Опел-Астра”,  сокини 31-солаи ноҳияи Қубодиён дастгир шуд. Ин ҳодиса мавриди тафтиш қарор дорад.