Тақдими кумакпулӣ ба донишҷӯёни Конибодом

Конибодом, 17.12.2015 (АМИТ «Ховар»).-Дар Қасри Арбоб мулоқоти раиси шаҳри Конибодом Ғайбулло Боҳирӣ бо донишҷӯёни конибодомӣ, ки дар макотиби олии вилояти Суғд таҳсил доранд, баргузор гардид. Раиси шаҳр оид ба дастовардҳои шаҳри Конибодом, сохтмони корхонаву кӯдакистонҳо ва ободониву бунёдкориҳои шаҳр маълумот дод.
Зимни саволу ҷавоб бо донишҷӯён асосан бобати таъминот бо ҷойи кор, фароҳам овардани шароит барои гузаронидани таҷрибаомӯзӣ, рӯзҳои шанбе то соати 18.00 ба роҳ мондани нақлиёти мусофирбари Конибодом-Хуҷанд, пешгирии шомилшавии ҷавонон ба ҳизбу ҳаракатҳои ифротгаро саволу пешниҳодҳои худро иброз дошта, посухҳо гирифтанд.
Сипас аз номи раиси шаҳр ба хобгоҳи донишҷӯён маводи хӯрокворӣ ва ба 70 донишҷӯ кумакпулиҳои яквақта супорида шуданд.