Толибон якдигарро мекушанд

Душанбе, 09.12.15. (АМИТ «Ховар»). – Теъдоди  талафоти  ҷангиёни «Толибон» дар  ҷараёни   задухӯрдҳои байни  худ  дар вилояти  Ҳироти  Афғонистон  то имрӯз  ба  24  нафар  расидааст. 
Амалиётҳои  ҳарбӣ  субҳи  рӯзи  душанбе  дар  вулусволии  Шиндон оғоз ёфта,  мувофиқи  ҳисоботи  намояндагони  мақомоти  ҳифзи  ҳуқуқ  то имрӯз идома доранд. 
Иштирокдорони   задухӯрдҳои  мусаллаҳона  ҷонибдорону  муқобилони   роҳбари  ҳозираи  ҷунбиши «Толибон» мулло Ахтар Мансур  ба  шумор  мераванд. 
Худи  намояндагони  мухолифини  мсаллаҳи  оштинопазир то имрӯз моҷарои  дар  Ҳирот  рухдодаро  шарҳ  надодааст,   хабар  медиҳад  Агентии  иттилоотии  «Хома пресс».
Қобили  зикр  аст, ки роҳбарияти  ҷунбиши  шӯришгарон ба  ҳадди  имкон   кӯшиш  менамояд, ки маълумотро  дар  бораи  ихтилофот  дар  сафҳои «Толибон»,  хусусан баъди  паҳншавии хабарҳо дар  бораи захм  бардоштани  худи  мулло  Мансур  дар  ҷараёни боз  як  ихтилофоти  дохилӣ  дар  Покистон  овоза накунад.