Туркманистон Тоҷикистонро баъд аз заминларзаи шадид дастгирӣ намуд

Душанбе, 17 декабр (АМИТ «Ховар»).-Ба зарардидагони заминларзаи минтақаҳои Тоҷикистон аз Туркманистон ёрии башардӯстона мерасад.  
Бино ба иттилои Вазорати корҳои хориҷии кишвар, Туркманистон ба Тоҷикистон 1000 тонна сӯзишворӣ, 134 тонна орди гандумии навъи якум, 120 тонна равғани пахта ва 120 тонна арматур барои сохтмон ҳамчун кумаки башардӯстона равон кардааст. 
«Кишварҳои мо барои густариш ва таҳкими муколамаи байнидавлатии Тоҷикистон ва Туркманистон дар соҳаҳои гуногун, аз ҷумла дар соҳаи фарҳангию гуманитарӣ минбаъд ҳам талош мекунанд. Дар робита ба ин, ҷониби Туркманистон ба мардуми Тоҷикистон дар вазъияти душвор ёрӣ мерасонад»,-зикр кард сафири Туркманистон дар Тоҷикистон Ишонқул Аманлиев, иттилоъ медиҳад МИР 24. 
Ҳукумати Тоҷикисон ба Туркманистон миннатдории худро баён намуд. Ҳукуматдорон ваъда доданд, ки ин кумак дар наздиктарин фурсат ба мардуми зарардидаи минтакаҳо расонида мешавад.