Аҳмад Осим Арар: Тоҷикистону Туркия кишварҳое мебошанд, ки дар онҳо офатҳои табиӣ монанданд

Душанбе, 21.01.2016 (АМИТ «Ховар»).- «Аз соли 1992 ин ҷониб баъд аз соҳибистиқлол гардидани Тоҷикистон Ҷумҳурии Туркия бо Тоҷикистон ҳамкории худро ба роҳ монда, то имрӯз равнақ дода истодааст»,-иброз дошт сафир, ваколатдори муваққатӣ оид ба корҳои Ҷумҳурии Туркия дар Ҷумҳурии Тоҷикистон Аҳмад Осим Арар имрӯз зимни супоридани кумаки башардӯстона, ки барои зарардидагони заминларзаи вилояти Бадахшон пешбинӣ шудааст.
Аҳмад Осим Арар илова намуд, ки Ҷумҳурии Тоҷикистону Туркия кишварҳое мебошанд, ки дар онҳо офатҳои табиӣ монанданд. Ба гуфтаи ӯ дар Туркия низ ҳамин гуна заминларзаҳои шадид доимо ба амал омада меистанд ва соли 1999 бори охир дар Ҷумҳурии Туркия чунин як заминҷунбии сахт рух додааст.
Инчунин номбурда илова намуд, ки Ҷумҳурии Туркия аз рӯи имконияти ҷойдошта кумаки худро ба мардуми зарардидаи Тоҷикистон мерасонад ва хоҳони он аст, ки ҳеҷ гоҳ ин гуна офатҳои табиӣ рух надиҳанд.