АFP: ДИ масъулияти амалиёти террористӣ дар назди консулгарии Покистон дар Афғонистонро ба дӯши худ гирифт

Душанбе, 14.01.2016. (АМИТ «Ховар»). — Гурӯҳи террористии «Давлати исломӣ» масъулияти ҳамла ба консулгарии Покистон дар шаҳри Ҷалолободи Афғонистонро ба дӯши худ гирифт. Дар ин бора Агентии АFP хабар дод.
Мувофиқи маълумоти намояндаи волии вилоят Атоулло Ҳогиёнӣ, террористи худкуш ба бинои намояндагии дипломатӣ ворид шуданӣ буд, вале ҳангоми ӯро нигоҳ доштани муҳофизи консулгарӣ мавсуф асбоби таркандаро ба кор даровард. Баъди ин байни ду шарики номбурда ва силоҳбадастони афғон оташфишонӣ оғоз ёфта, ҳамаи ҳамлагарон нест карда шуданд.
Тавре ки намояндаи Вазорати корҳои дохилии Афғонистон Содиқ Содиқӣ хабар дод, бар асари ҳамла камаш ҳафт нафар кормандони вазорат ҳалок шуданд. Ба гуфтаи мавсуф, ҳамчунин ҳафт корманди пулис захм бардошта, чанде аз аҳолии осоишта, аз ҷумла кормандони намояндагии дипломатӣ осеб дидаанд.
Консулгариҳои Ҳиндустону Эрон низ дар маҳалли ин воқеа қарор доранд.