Дар Душанбе намоишгоҳи маҳсулоти саноатии Покистон доир мешавад

Душанбе, 22.01.2016. (АМИТ «Ховар»). — Дар ҷараёни мулоқоти раиси Палатаи савдо ва саноати Тоҷикистон Шариф Саид бо сафири Покистон дар Тоҷикистон Тариқ Иқбол Сумро аҳд шуд, ки моҳи апрели соли 2016 дар шаҳри Душанбе намоишгоҳи маҳсулоти саноатӣ ва технологияҳои Покистон доир гардида, форуми тоҷирони ҳар ду кишвар роҳандозӣ шавад.
Тавре ки ПСС ҶТ хабар медиҳад, мусоҳибон хоҳиши тарафайнро дар мавриди истифодаи имконоти мавҷуда барои густариши муомилоти молии дуҷониба ва рушди минбаъдаи равобит бо василаи ташкили боздиди тоҷирон аз кишварҳои ҳамдигар, доир намудани конфронсҳо ва намоишгоҳу ярмаркаҳо иброз доштанд.
Раиси ПСС ҶТ бахшҳои тиҷорату бонкҳо, гидроэнергетика, истихроҷи маъдан, нақлиёт ва телекоммуникатсия, соҳаҳои саноат, аз ҷумла мошинсозӣ, металлургияи ранга, саноати сабук ва соҳаҳои коркарди маҳсулотро аз ҷумлаи самтҳои муҳими ҳамкорӣ маънидод кард.
Ҷонибҳо ба масоили ташкили корхонаҳои муштарак, ҳамкорӣ дар бахши саноати дорусозӣ бо истифода аз набототи шифобахши кишвар, сайёҳӣ, истифодаи васеи минтақаҳои озоди иқтисодии «Суғд», «Панҷ», «Данғара» ва «Ишкошим» — и Тоҷикистон таваҷҷуҳи хоса зоҳир намуданд.