ДТТ қабули довталабонро ба докторантура аз рӯи 7 ихтисоси доктори PHD дар соли 2016 ба нақша гирифтааст

Душанбе, 14.01.2016 (АМИТ «Ховар»).-«Донишгоҳи технологии Тоҷикистон тасмим гирифтааст, ки аз 1-уми сентябри соли 2016 қабули довталабонро ба докторантура аз рӯи 7 ихтисоси доктори PHD ба нақша гирад»,-иброз намуд ректори ин донишгоҳ Шоҳиён Нуралӣ Набот имрӯз зимни нишасти матбуотӣ.
Тибқи иттилои ректор дар донишгоҳ инчунин Маркази таҳсилоти фосилавӣ фаъолият менамояд, ки дар замимаи он донишҷӯён метавонанд дар баробари таҳсил дар Тоҷикистон тариқи фосилавӣ бо истифода аз технологияҳои иттилоотию коммуникатсионӣ дар Донишгоҳи давлатии техникии Тернопол, Ровнои Украина ва як қатор муассисаҳои таҳсилоти олии касбии Русия таҳсил намоянд.
Донишгоҳи технологии Тоҷикистон нахустин таълимгоҳи олии ҷумҳурӣ мебошад, ки дар сохтори он Маркази ҳамоҳангсозии таҳсилот ба забони хориҷӣ оид ба модели аврупоии таҳсилот таъсис дода шуд. Дар заминаи он гурӯҳҳои академии таълимаш ба забони англисӣ таъсис дода шудаанд.
Бо мақсади ҷалби омӯзгорони соҳибкасб барои бурдани дарсҳои тахассусӣ дар доираи ҳамкориҳои ДТТ бо Донишгоҳи миллии хоҷагии об ва истифодаи табиат аз шаҳри Ровнои Украина ду олими ботаҷриба Н.Б. Савина ва О.Н. Степанченко даъват шуда, аз рӯи фанҳои “Усулҳо ва моделҳои математикӣ дар иқтисодиёт” ва “Технологияҳои мултимедиявӣ” ба донишҷӯён дар муддати 10 рӯз дарс гузаштанд. Инчунин қарордод оид ба навиштани китобҳои муштараки дарсӣ қабул шуд.