ФБД ба зиёда аз 1 миллион мусофир хизмат расонид

Душанбе, 26.01.2016.(АМИТ «Ховар»).- «Фурудгоҳи байналмилалии Душанбе» дар соли сипаригардидаи 2015 ба 1 миллиону 135 ҳазор нафар мусофир хизмат расонид, ки аз он беш аз 575 ҳазор мусофири рафта ва наздики 560 ҳазор мусофири омада мебошад»,- гуфт зимни нишасти матбуотӣ ба хабарнигорон Рустам Холиқзода -директори Ҷамъияти саҳомии кушодаи «Тоҷик Эйр» ва ҶСК «Фурудгоҳи байналмилалии Душанбе».
Рустам Холиқзода дар ҷамъи хабарнигорон роҷеъ ба фаъолияти молиявию хоҷагидории ширкати ҳавопаймоии «Тоҷик Эйр» ва ҶСК «Фурудгоҳи байналмилалии Душанбе» ва дурнамои рушди ин муассисаҳо, ки бо назардошти вазъи бӯҳрони молиявиии ҷаҳонӣ тарҳрезӣ шудааст, гузориш ироа намуд. Мавсуф зикр кард, ки роҳбарияти фурудгоҳ барои коҳиш додани оқибатҳои бӯҳрони молиявӣ тадбирҳои амалӣ андешида, ба нишондиҳандаҳои хуби истеҳсолӣ ноил гардид.
Зикр шуд, ки дар зарфи соли 2015 даромади умумии корхона беш аз 290 миллион сомониро ташкил дод, ки дар қиёс ба соли 2014-ум 9,9% зиёд мебошад. Дар ин давра беш аз 2200 тонна бор ва почта қабул ва интиқол дода шудааст.