Хуҷанд: Фаъолияти 157 корхонаву коргоҳи нав бо 2566 ҷойҳои нави корӣ

Хуҷанд, 16.01.2016. (АМИТ «Ховар»).- Ба иттилои раиси вилояти Суғд дар самти ба кор андозии коргоҳҳои хурду миёна дар миқёси вилоят соли 2015 — 157 корхонаву коргоҳи нав бо 2566 ҷойи корӣ ба фаъолият шурўъ намуданд, ки онҳо асосан корхонаҳои соҳаи саноати истеҳсолӣ, масолеҳи сохтмон, хўрокворӣ ва масолеҳи сабукро дар бар гирифта, барои таъмини бозори дохилӣ бо маҳсулоти истеҳсоли ватанӣ ва воридотивазкунанда мусоидат намуданд.
Дар ин раванд ба таъсири манфии омилҳои беруна нигоҳ накарда, дар давоми соли гузашта ҳаҷми истеҳсоли маҳсулоти саноатӣ дар вилояти Суғд ба 4,2 млрд. сомонӣ расонида шуд, ки нисбат ба ҳамин давраи соли 2014 афзоиш бо назардошти индекси нархҳо 118,8 фоиз таъмин гардид.
Вобаста ба нақшаи даромад ва ҳаҷми истеҳсоли маҳсулот А.Қодирӣ илова намуд, ки дар соли 2015 қисми даромади буҷети вилоят ба андозаи 103,1% таъмин гардид.