Исфара: Паёми имсола-инъикосгари дурнамои ояндаи кишвар

Душанбе, 25.01.2015. (АМИТ «Ховар»).-Дар шаҳру деҳоти Исфара Паёми навбатии Асосгузори сулҳу ваҳдат-Пешвои миллат муҳтарам Эмомалӣ Раҳмонро ба Маҷлиси Олии Ҷумҳурии Тоҷикистон гарм истиқбол намуданд.
Дар ин радиф дар тамоми корхонаву ташкилот, муассисаву хоҷагиҳо ва ҷойҳои ҷамъиятӣ хоҳишмандон тавонистанд намоиши мустақими телевизиониро аз ҷаласаи якҷояи ММ ва МН Маҷлиси Олии ҶТ тамошо кунанд. Барои мардум фаҳмидани сиёсати дохиливу хориҷии Ҳукумати ҶТ дар шароити болоравии хавфу хатарҳои терроризму экстремизм, мураккабшавии сиёсати байналхалқӣ, бархурди манфиати абарқудратҳо дар самти азнавтақсимкунии дунё ва бӯҳрони молиявии ҷаҳонӣ басо муҳим буд.
Бо вуҷуди мушкилоте, ки аксаран таҳти таъсири омилҳои беруна пеш омадаанд, то ба ҳадди назаррас афзун намудани ҳаҷми маҷмӯи маҳсулоти дохилӣ ва пасандозҳо дар бонкҳо, кам карда шудани сатҳи камбизоатӣ, коҳиши дараҷаи вафоти модару кӯдак ва нисбатан дарозшавии умри шаҳрвандон дар Тоҷикистон далели раднопазири он аст, ки Ҳукумати ҶТ дар соли сипаригардида сиёсати дурустро пиёда намуд.
Тасмимҳои Сарвари давлат дар самти болобарии сатҳи рушди иқтисодиёту иҷтимоиёт, теъдоди корхонаҳои истеҳсолӣ, ҷойҳои нави корӣ, афзун намудани маошу нафақаҳо нишон медиҳанд, ки давлати Тоҷикистон дар муқобили бӯҳрони ҷаҳонии молиявӣ низ барномаи рушди мукаммалу мушаххас дорад ва амалигардонии он танҳо дар фазои сулҳу салоҳ, дарки амиқи масъулияти шаҳрвандӣ ва меҳнати софдилона баҳри шукуфоии Ватан имконпазир аст.