Кумитаи ҳифзи муҳити зист ғолибони озмунро қадрдонӣ кард

Душанбе, 04.01.2016 (АМИТ «Ховар»).- Бахшида ба соли нави 2016 раиси Кумитаи ҳифзи муҳити зисти назди Ҳукумати Ҷумҳурии Тоҷикистон Хайрулло Ибодзода кормандони кумита ва ғолибони озмуни ҷумҳуриявиро бахшида ба натиҷагирӣ аз Даҳсолаи байналмилалии “Амалиёти об барои ҳаёт” (солҳои 2005-2015), ки аз 2 феврали соли 2015 байни кормандони воситаҳои ахбори омма эълон гардида буд, табрик гуфт.
Дар ҷамъомади солинавӣ зикр гардид, ки моро дар соли 2016 вазифаҳои муҳимтаре интизоранд ва иҷрои самарабахши онҳоро бе ҳамкорӣ бо вазорату идораҳо, мақомоти иҷроияи ҳокимияти давлатӣ, муассисаҳои илмӣ-тадқиқотӣ, маориф, тандурустӣ, зиёиён, иттиҳодияҳои ҷамъиятӣ, воситаҳои ахбори омма ва ҷомеаи шаҳрвандӣ наметавон ба таври зарурӣ ва дилхоҳ амалӣ намуд.
Изҳори бовар карда шуд, ки бо ҳамкории дастаҷамъона дар соли 2016 ба тамоми муваффақиятҳои шоён дар беҳдошти муҳити зист ва солимии ҷомеа ноил хоҳем шуд.
Раиси кумита Х. Ибодзода ба ғолибони озмун ифтихорномаҳо ва мукофоти пулӣ тақдим кард.