Мулоқоти сафири Тоҷикистон бо мудири Конуни миллии тарҷумаи Миср

Душанбе, 3.01.2016. (АМИТ «Ховар»). – Чанде қабл дар Қоҳира сафири Ҷумҳурии Тоҷикистон дар Миср Хусрав Нозирӣ бо мудири Конуни миллии тарҷумаи Миср Анвар Муғис мулоқот кард. Дар ин мулоқот масъалаҳои барқарорсозӣ ва густариши ҳамкорӣ байни ниҳодҳои дахлдори ду кишвар дар заминаи тарҷума ва нашри китобҳои муаллифони тоҷик дар Миср мавриди баррасӣ қарор гирифтанд. Дар ин росто тавофуқ ҳосил шуд, ки дар давоми соли оянда дар Конуни миллии мазкур дар Қоҳира ҳамоишҳои рӯнамоии китобҳои муаллифони тоҷик, ки ахиран ба забони арабӣ тарҷума ва чоп шудаанд, баргузор гарданд.
Қобили зикр аст, ки Конуни миллии тарҷумаи Миср то ба имрӯз тақрибан 2500 адад китобро аз 35 забони ҷаҳон ба арабӣ тарҷума ва чоп кардааст. Аз ҷумла осори Фирдавсӣ, Саноӣ, Хайём, Сӯзании Самарқандӣ, Ғазолӣ, Аттор, Румӣ, Саъдӣ, Ҳофиз, Низомӣ, Ҷомӣ, Бедил, Айнӣ ва бузургони дигари шеъру адаби мо дар муассисаи мазкур ба арабӣ тарҷума ва чоп шудаанд.