Нақши Суди Олӣ дар таҳкими волоияти қонун
![](https://khovar.tj/wp-content/uploads/2016/01/U19A3712-1.jpg)
Душанбе, 18.01.2016.(АМИТ «Ховар»).-«Суди Олии кишвар дар таъмини адолати судӣ, таҳкими волоияти қонун, ҳифзи манфиатҳои давлат ва ҳуқуқу озодиҳои инсон ва шаҳрвандон дар соли сипаригардидаи 2015 корҳои муайянеро ба сомон расонида, ба ҳайси суди марҳилаи якум 51 парвандаи ҷиноятӣ, 18 гражданӣ, 6 оилавӣ, 45 ариза оид ба барқарор намудани муҳлати мурофиавӣ ва 7 пешниҳодро баррасӣ намуд». Ин матлабро Шермуҳаммад Шоҳиён -раиси Суди Олии ҷумҳурӣ зимни натиҷагирӣ аз фаъолияти Додгоҳи Олии кишвар дар соли 2015 дар нишасти матбуотӣ баён кард.
Раиси Суди Олии кишвар афзуд, ки аз 51 парвандаҳои ҷиноятии баррасишуда 47 парванда нисбат ба 74 нафар бо баровардани ҳукми айбдоркунӣ, бо як парванда нисбат ба 1 нафар чораҳои маҷбурии дорои хусусияти тиббӣ татбиқ гардида, 1 парванда нисбат ба ду нафар бинобар нопуррагии тафтиши пешакӣ барои гузаронидани тафтиши иловагӣ баргардонида шуда, пешбурди 2 парванда нисбат ба ду нафар бо татбиқи Қонуни Ҷумҳурии Тоҷикистон «Дар бораи авф» ва бинобар гузаштани муҳлати ба ҷавобгарии ҷиноятӣ кашидан қатъ карда шуд.
Ҳамзамон раиси Суди Олии ҷумҳурӣ зикр кард, ки аз 74 маҳкумшуда ба 67 нафар ҷазои маҳрум сохтан аз озодӣ, ба як нафар ҷазо шартан татбиқ карда нашуда, нисбат ба шаш нафар ҷазои ҷарима таъйин гардид. Инчунин дар ин давра дар марҳилаи якум 18 парвандаи гражданӣ бо қабули 8 ҳалнома моҳиятан ҳал карда шуда, баррасии дутоаш бинобар даст кашидани даъвогарон аз даъво ва тасдиқи созиши тарафҳо қатъ карда, як аризаи даъвогӣ бе баррасӣ мононда ва ҳафт дархост оид ба эътироф ва иҷрои ҳалномаҳои судҳои давлатҳои хориҷӣ баррасӣ шуданд.