Шаҳрвандони аз ҷониби Эрон озодшудаи ИМА аз Теҳрон рафтанд

Душанбе, 18.01.2016. (АМИТ «Ховар»). — Рӯзи якшанбе чор нафар амрикоиҳои аз ҷониби ҳукуматдорони Эрон озодшуда, аз ҷумла хабарнигори рӯзномаи Washington Post Ҷейсон Резаян аз кишвар рафтанд, хабар медиҳад Агентии Рейтер. Шаҳрвандони ИМА ҳамроҳи пайвандонашон дар тайёраи ширкати ҳавопаймоии Швейтсария сӯи шаҳри Берн парвоз карданд.
Мувофиқи маълумоти рӯзномаи Washington Post, собиқ асиронро аз Швейтсария ба пойгоҳи низомии ИМА воқеъ дар Олмон бурда, табибон онҳоро муоина мекунанд.
Қаблан ИМА ва Эрон дар бораи табодули маҳбусон хабар дода буданд. Эрон чор нафар маҳбусони ИМА — хабарнигор Ҷейсон Резаян, рӯҳонӣ Сайёд Абединӣ, хидматчии ҳарбӣ Амир Ҳикматӣ, ҳамчунин Нусратулло Хисравиро озод намуда, аз озод кардани як нафар донишҷӯи амрикоӣ, ки якчанд моҳ пештар дар Теҳрон дастгир шуда буд, хабар дод.
ИМА ҳафт нафар эрониҳоеро озод намуд, ки шаш нафарашон ду табааи шаҳрвандӣ доранд. Иёлоти Муттаҳидаи Амрико ҳамчунин дархостро дар мавриди дастгиршудагон лағв намуда, айбномаҳоро дар ҳаққи 14 нафар эрониён бекор кард.