Қӯшунҳои сарҳадӣ: пешниҳоди маълумотнома барои як моҳ

Душанбе, 27.01.2016. (АМИТ «Ховар»).-Аз 1 то 26 январи соли равон дар минтақаҳои сарҳадии ҳудуди масъулияти отрядҳои сарҳадии Хоруғ, Шӯрообод, Ҳамадонӣ, Турсунзода, Истравшан, Исфара кӯшишҳои ғайриқонунӣ убур намудани хатти сарҳади давлатии Ҷумҳурии Тоҷикистон аз тарафи шаҳрвандони давлатҳои ҳамсарҳад ва шаҳрвандони Ҷумҳурии Тоҷикистон, инчунин интиқоли маводи мухаддир ва молҳои ниёзи мардум аз тарафи нарядҳои сарҳадӣ ва гурӯҳҳои фаврии қӯшунҳои сарҳадии КДАМ Ҷумҳурии Точикистон пешгирӣ ва дастгир шуданд.
Дар натиҷаи амалиёти гузаронидашуда, мусодираи маводи мухаддири ҳашиш ва чарс зиёда аз 41 кг 250гр, 1 яроқи оташфишон, лавозимоти ҷангӣ 17 донаро ташкил дода, 104 вайронкунандаи низом ва реҷаи сарҳади давлатӣ дастгир шуданд. Дар ин давра мусодираи молҳои ниёзи мардум, аз ҷумла пиёз, орд ва меваҳои хушк зиёда аз 32 тоннаро ташкил дод.
Нисбат ба дастгиршудагон ва мусодираи молҳои ниёзи мардум ҳуҷатҳои лозимӣ тартиб дода шуда, ба вазорату идораҳои дахлдор супорида шуданд. Оид ба маводи мухаддир ва яроқи оташфишон ҳоло аз тарафи мақомоти дахлдор тафтишот идома дорад.
Дар ин бора Муҳаммад Улуғхоҷаев, сардори маркази матбуоти Сарраёсати қӯшунҳои сарҳадии КДАМ ҶТ хабар дод.