Суғд: Нақшаи даромадҳои буҷети давлатӣ барзиёд таъмин гардид

Душанбе, 6.12.2015. (АМИТ «Ховар»).-Дар 11 моҳи соли равон нақшаи даромадҳои буҷети давлатӣ (бе дарназардошти андози иҷтимоӣ) дар вилояти Суғд ба андозаи 102,9 фоиз таъмин гардида, ба буҷет 1210,5 млн. сомонӣ ворид гардид, ки нисбат ба нақшаи тасдиқгардида 34,6 млн. сомонӣ ва нисбат ба ҳамин давраи соли гузашта 164,9 млн. сомонӣ зиёд мебошад.
Дар давраи ҳисоботӣ ба буҷети маҳаллии вилоят ба ҷои 1093,3 млн. сомонӣ 1120,9 млн. сомонӣ ворид гардид, ки аз нақша 2,5 фоиз ё ин ки 27,6 млн. сомонӣ зиёд аст.
Қисми хароҷоти буҷетҳои маҳаллӣ 1069 млн. сомониро ташкил дода, бо мақсади таъмини рушди соҳаҳои афзалиятноки дорои хусусияти иҷтимоӣ, маориф, тандурустӣ, ҳифзи иҷтимоии аҳолӣ, фарҳанг ва варзиш беш аз 872,9 млн. сомонӣ маблағ равона шуданд, ки 81,6 фоизи хароҷоти умумии буҷети вилоятро ташкил медиҳанд.
Барои дастгирии буҷетҳои маҳаллии шаҳру ноҳияҳои субвенсионӣ аз буҷети вилоят 71,5 млн. сомонӣ маблағ мақсаднок равона гардид.