Татбиқи зиёда аз 130 лоиҳа дар Қурғонтеппа

Душанбе, 18.01.2016. (АМИТ «Ховар»).- Дар шаҳри Қурғонтеппа бунёди 2 муассисаи таълимӣ бо 1240 ҷойи нишаст, ки маблағи лоиҳавии пешбинишудаи он 26 млн. 200 ҳазор сомонӣ, сохтмони биноҳои иловагӣ дар 5 муассисаи таълимӣ бо 2280 ҷойи нишаст, маблағи пешбинишудаи он 27 млн. 650 ҳазор сомонӣ, сохтмони муассисаи таълимии томактабӣ бо 120 ҷойи нишаст бо маблағи 2 млн. 300 ҳазор сомонӣ ва дигар биноҳои таълимию табобатии замонавӣ дар доираи «Барномаи рушди иқтисодию иҷтимоии шаҳри Қурғонтеппа барои солҳои 2016-2020» дар назар аст.
Барнома аз 1 январи соли 2016 дар шаҳри Қӯрғонтеппа мавриди амал қарор гирифт.
Дар доираи барнома татбиқи зиёда аз 130 лоиҳа пешбинӣ шудааст. Маблағгузории он дар тӯли 5 соли оянда солҳои 2016-2020 ба ҳамаи соҳаҳо ва аз ҳисоби ҳамаи сарчашмаҳо зиёда аз 1 миллиарду 751 миллион сомонӣ пешбинӣ гардидааст.
Тибқи ин барнома дар минтақаи саноатӣ бунёди 12 корхонаи истеҳсолӣ дар назар дошта шудааст. Тӯли солҳои 2016-2020 дар шаҳр сохтмону барқарорсозии зиёда аз 60 иншоот аз ҳисоби буҷаи ҷумҳурӣ, вилоятӣ ва маҳаллӣ ба нақша гирифта шудааст.