Террористон меҳмонони хориҷиро ҳадафи тир қарор доданд

Душанбе, 16.01. 2016 (АМИТ «Ховар») — Дирӯз бегоҳӣ дар пойтахти кишвари Буркина Фасо шаҳри Уагадугу амали террористӣ содир шуд, ки бар асари он тибқи ҳисоби пешакӣ на кам аз 20 сокини осоишта ба ҳалокат расиданд. Агентии AFP аз суханони сардухтури беморхонаи марказии пойтахти Буркина Фасо Робер Сангаре навиштаст, ки дар давоми як соат зиёда 15 нафар ҷароҳатбардоштагонро ба беморхона оварданд. Дар меҳмонхонаи мазкур асосан кормандони ташкилоти зертобеи СММ иқомат дошта, бештари хориҷиён низ ҳамин меҳмонхонаро интихоб мекарданд. Вазири корҳои дохилӣ Алфа Барри иттилоъ додааст, ки дар миёни ҳамлагарон аврупоиҳо низ будаанд. Террористон зимни ҳамлаи мусаллаҳона ба меҳмонхона бештар хориҷиёнро ҳадафи тир қарор дода, илова ба он якчанд нафари дигарро гаравгон гирифтанд.
Созмони террористии «Ал-қойида дар кишварҳои Мағриб» амали террористии содиршударо ба зиммаи худ гирифтааст. Неруҳои ҳукуматӣ амалиёти таъқиб намудани террористон ва озод кардани гаравгонҳоро дар якҷоягӣ бо неруҳои махсуси Фаронса амалӣ карданианд.