ВКД: Вохӯрии вазир бо cафири Ҳиндустон

Душанбе, 18.01.2016. (АМИТ «Ховар») — Вазири корҳои дохилӣ Раҳимзода Рамазон Ҳамро бо Сафири фавқулодда ва мухтори Ҷумҳурии Ҳиндустон дар Ҷумҳурии Тоҷикистон Бираҷа Прасад мулоқот намуда, дар ҷараёни суҳбат ҷонибҳо оид ба масъалаҳои мубориза бо терроризм, экстремизм, гардиши ғайриқонунии маводи мухаддир, силоҳ ва дигар масоили мубрами рӯз мубодилаи афкор намуданд.
Вазири корҳои дохилӣ зикр кард, ки: «Тоҷикистону Ҳиндустон мардумони дорои фарҳанг ва маданияти куҳан буда, боиси хушҳолист, ки байни ду давлат робитаи дӯстии қавӣ ба роҳ монда шуда, ҳамкории дуҷониба ва бисёрҷонибаи ба имзорасида, сол то сол вусъат меёбанд. Соли 2001 Созишнома дар бораи ёрии ҳуқуқии байниҳамдигарӣ миёни Ҷумҳурии Тоҷикистон ва Ҷумҳурии Ҳиндустон оид ба парвандаҳои ҷиноятӣ ба имзо расидааст, ки ҳамкориро дар мубориза бо ҷинояткорӣ, бахусус бар зидди терроризм, инчунин дар самтҳои мубодилаи иттилоот, иҷрои дархосту қарорҳо дар бораи гузаронидани кофтуков пешбинӣ менамояд. Имрӯз вазъияти ба амаломада дар ҷаҳон моро водор менамояд, ки дар якҷоягӣ бар зидди ҷинояткорӣ ва хатару таҳдидҳои ҷаҳони муосир муборизаи бе амон барем».
Бираҷа Прасад дар тақвияти гуфтаҳои вазир изҳор дошт, ки: «Мо низ ҷонибдори ҳамкории васеъ ва ҳадафманди кишварҳоямон ҳастем ва омодаем, ки баҳри тақвияти онҳо дар ҳама самтҳо кӯшишҳои пайваста ба харҷ диҳем».
Вохӯрӣ дар фазои дӯстӣ ва якдигарфаҳмӣ баргузор гардида, ҷонибҳо бо бовар изҳор намуданд, ки дар оянда низ ҳамкориро ба роҳ монда, дар таъмини амният ва сулҳу суботи кишварҳои ҳамдигар кумак мерасонанд.