Блаттерро кӣ иваз мекунад?

Душанбе, 26.02.2016 (АМИТ «Ховар»).-Имрӯз дар ҳаёти футболи ҷаҳон навгонӣ ворид мешавад. Тақрибан дар соати аз 16 то 18-и Тоҷикистон Президенти нави Федератсияи ҷаҳонии футбол интихоб шуда, Президенти доимии чанд соли ахир Зепп Блаттерро, ки ба муҳлати 6 сол аз футбол дар канор шудааст, иваз мекунад.
Дар овоздиҳӣ 207 федератсияи кишварҳои ҷаҳон, аз ҷумла Тоҷикистон, ки узви FIFA мебошанд, иштирок мекунанд. Танҳо федератсияҳои Индонезия ва Кувайт, ки чанде пештар муҷозот шудаанд, ҳаққи овоздиҳӣ надоранд.
Дар Конгресс ноиби Президенти ФФТ ва ҳамзамон Котиби генералии он Хуршед Файзуллозода Тоҷикистонро намояндагӣ мекунад.
Овоздиҳӣ ба шакли пинҳонӣ сурат гирифта, аз рӯи алифбо дар кабинаҳои махсус гузаронида мешавад.
Номзаде, ки аз 2/3 ҳиссаи овозҳоро ба даст меорад, Президенти нави FIFA эълон хоҳад шуд. Дар сурати миқдори муайяни овозҳоро ба даст наовардани номзадҳо овоздиҳии такрорӣ то он даме, ки яке аз онҳо беш аз 50 фоизи овозҳоро ба даст наорад, гузаронида хоҳад шуд.
Номзадҳо барои мансаби Президенти FIFA инҳоянд:
Шайх бин Иброҳим Алхалифа аз Баҳрайн, Президенти КФО.
Жером Шампан аз Фаронса, мушовири пешинаи Блаттер дар масъалаҳои байналмилалӣ.
Малик Алӣ бин Ҳусейн аз Урдун.
Ҷани Инфантино аз Швейтсария ва Италия.
Токио Сексвале аз Африқо.