Бохте, ки умед мепарварад
![](https://khovar.tj/wp-content/uploads/2016/02/tajikistan_thailand9.jpg)
Душанбе, 12.02.2016 (АМИТ «Ховар»).- Дастаи мунтахаби футзали Тоҷикистон дар аввалин вохӯриаш дар Чемпионати Осиё дар шаҳри Тошканд дар гурӯҳи “С” бо тими мунтахаби Таиланд вохӯрда, бо натиҷаи 5 бар 4 мағлуб шуд. Новобаста ба он, ки Таиланд ба панҷгонаи беҳтарини Осиё дар футзал шомил аст, бозингарони ҷавони мо тавонистанд бо рақиби ботаҷрибаашон бозии хубу аҳлона нишон дода, то дақиқаи охир натиҷаи мусовии 4 бар 4 -ро нигоҳ доранд. Аммо сонияи охир ва бахти варзишӣ ба футзалистони Таиланд хандид ва онҳо бо голи задаи Виват ба пирӯзӣ комёб шуданд.
Дастаи мунтахаби Тоҷикистон, ки ҳайати асосиашро ҷавонон ташкил мекунанд ва он симои худро нисбат ба солҳои пешин имсол дигар кардааст, бо ин бозиаш умедро ба дили мухлисон ҷой дод, то бовар кунем, ки дар бозиҳои оянда онҳо метавонанд бар дастаҳои Ветнам (13-уми феврал) ва Тайбейи Чин (15-уми феврал) ғалаба кунанд.
Дар бозии дигари ин гурӯҳ Ветнам бар Тайбейи Чин бо ҳамин натиҷаи 5 бар 4 пирӯз гардид.