Муайян гардидани ғолибони мусобиқа оид ба муҳорибаҳои тан ба тан

Душанбе, 15.02.2016. (АМИТ «Ховар»). -12-13-уми феврали соли равон дар маҷмааи варзишии Шӯрои ҷумҳуриявии «Динамо»-и Вазорати корҳои дохилӣ мусобиқаи варзишӣ аз рӯи намуди муҳорибаҳои тан ба тан (самбои муҳорибавӣ) миёни кормандони таъиноти махсуси мақомоти ҳифзи ҳуқуқ ва сохторҳои қудратии кишвар барои дарёфти «Ҷоми вазири корҳои дохилии Ҷумҳурии Тоҷикистон» таҳти шиори «Варзиш — солимии ҷомеа» баргузор гардид, ки натиҷаи он имрӯз ҷамъбаст гардиданд.
Ғолибони мусобиқа бо Ҷом, медал, диплом, мукофотпулӣ ва туҳфаҳои хотиравӣ сарфароз гардонида шуданд.
Дар фарҷом вазири корҳои дохилӣ Раҳимзода Рамазон Ҳамро зикр кард, ки мусобиқаи имрӯза бори дигар исбот намуд, ки таҳкими дӯстию рафоқат миёни кормандони мақомоти ҳифзи ҳуқуқ ва ҷавонони кишвар, дар баробари тарғиби варзиш ва ҳаёти солим аз муҳимтарин нукта ба ҳисоб меравад.
Бояд зикр намуд, ки маҷмӯи омодагии усули варзишии самбо дар раванди таълимӣ-тамринии хизматчиёни воҳидҳои таъйиноти махсуси мақомоти ҳифзи ҳуқуқ ва сохторҳои қудратии аксар кишварҳои дунё, аз ҷумла дар Тоҷикистон васеъ истифода мешавад.