Мусодираи маводи нашъаовар дар ноҳияи Дарвоз

Душанбе, 29.02.2016. (АМИТ «Ховар»). -Шабонарӯзи гузашта кормандони зершуъбаи дар ноҳияи Дарвоз будаи Раёсати Агентии назорати маводи нашъаовари назди Президенти ҶТ дар ВМКБ дар мавзеи Туғаки деҳаи Сангеви ноҳияи Дарвоз сокини деҳаи Ёгедро бо гумони даст доштан дар муомилоти ғайриқонунии маводи нашъаовар дастгир намуданд.
Ҳангоми кофтукови шахсӣ аз номбурда ду борхалта, ки дар дохилашон 31 баста бо маводи хамирмонанди ҷигариранг мавҷуд буд, дарёфт ва мусодира шуд.
Тибқи хулосаи озмоишгоҳи ташхиси судии Раёсат, маводи мусодирашуда афюн буда, вазни умумии он 26 кг 923 граммро ташкил менамояд.
Нисбат ба ин ҳодиса аз рӯи моддаи 200 қ. 4 Кодекси ҷиноятии ҶТ (Муомилоти ғайриқонунии воситаҳои нашъадор ё моддаҳои психотропӣ) бо мақсади ба соҳибияти каси дигар додан ба миқдори махсусан калон парвандаи ҷиноӣ оғоз гардидааст.
Ҳоло чорабиниҳои фаврӣ барои муайян намудани шахсияти шаҳрвандони Тоҷикистон ва Афғонистон, ки ба ҷинояти мазкур алоқамандӣ доранд, гузаронида мешаванд.
Боздоштшуда ба муассисаи нигоҳдории муваққатии Раёсати агентӣ ворид карда шуд.