Пешвои миллат ва нақши таърихии ў

Душанбе, 29.02.2016 (АМИТ «Ховар»).-27 -уми феврал дар Китобхонаи миллии Тоҷикистон Конфронси илмии ҷумҳуриявӣ таҳти унвони «Эмомалӣ Раҳмон -Пешвои миллат ва нақши таърихии ў дар баланд бардоштани тамаддуни моддӣ ва маънавии миллат» доир гардид. Конфронс ба муносибати қабул гардидани Қонун «Дар бораи Асосгузори сулҳу Ваҳдати миллӣ — Пешвои миллат» бо ташаббуси созмони ҷамъиятӣ ва байналмилалии фонди «Муколамаи АвруОсиё» баргузор шуд.
Вазири фарҳанги Ҷумҳурии Тоҷикистон Шамсиддин Орумбекзода зарурати таърихии Қонун «Дар бораи Асосгузори сулҳу Ваҳдати миллӣ — Пешвои миллат»-ро баён намуда, зикр кард, ки Эмомалӣ Раҳмон сазовори аз ин ҳам баландтарин унвонҳо мебошад, зеро давлатро аз нестию миллатро аз парокандагӣ наҷот дод.
Инчунин Низомиддин Зоҳидӣ, муовини якуми вазири корҳои хориҷӣ, Ҳаким Мирсайдзод Саид, муовини вазири адлия, Маҳкам Маҳмудзода, раиси Суди конститутсияонии кишвар, Абдураҳим Холиқзода, раиси кумитаи Маҷлиси намояндагони Маҷлиси Олии Ҷумҳурии Тоҷикистон, Идигул Қосимзода, раиси Кумитаи кор бо занон ва оилаи назди Ҳукумати Ҷумҳурии Тоҷикистон ва Аҳтам Абдуллозода, раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон оид ба ин мавзӯъ сухан гуфтанд.