Сафари мунтахаби футзали Тоҷикистон ба Тошканд

Душанбе, 9.02.2016 (АМИТ «Ховар»).-Дастаи мунтахаби футзали Тоҷикистон марҳалаи дуввуми машқу тамринҳои худро дар шаҳри Қайроққум ба анҷом расонида, ба шаҳри Тошканд, макони баргузории бозиҳои ниҳоии Ҷоми Осиё оид ба футзал сафар кард. Сармураббии даста Ҳусейн Шодиев аз шогирдонаш умеди калон дорад, ки дар гурӯҳ хуб бозӣ карда, ба даври минбаъда роҳхат мегиранд. Футболбозони мо дар давраи дуввуми тайёрӣ ду вохӯрии таҷрибавиро бо дастаи мунтахаби Ӯзбекистон барпо карда, якеро мусовӣ ва дигареро бо бохт ҷамъбаст карданд. Футзалистони кишварамон дар гурӯҳи “С” бо тимҳои Таиланд рӯзи 11 феврал, бо Ветнам 13 феврал ва бо Тайбейи Чин 15 феврал қувва месанҷанд.