Саломатии миллат аз табибон вобастагии калон дорад

Душанбе, 29.02.2016. (АМИТ «Ховар»). -Барои тарғибу ташвиқи Паёми Асосгузори сулҳу Ваҳдати миллӣ, Пешвои миллат, Президенти ҶТ муҳтарам Эмомалӣ Раҳмон бобати татбиқи ҳадафҳои афзалиятноки соҳаи тандурустӣ, дар Маркази саломатии ноҳияи Ғончӣ бо табибону кормандони соҳаи тиб мулоқоти раиси ноҳия, узви раёсат ва Кумитаи иҷроияи Ҳизби Халқии Демократии Тоҷикистон дар ноҳия Рустам Ҷўразода баргузор гардид.
Муовини раиси ноҳия Рафоат Каримова аз нуктаҳои асосии Паёми Сарвари давлат сухан ронда, гуфт, ки соҳаи тандурустӣ дар ноҳия бояд боз ҳам мукаммалу ҷавобгўй ба талаботи роҳбарияти олии кишвар гардад ва таъмини саломатии сокинони диёр мебояд беҳтар кард. Инчунин аз маблағгузориҳо ва шароити хуби муҳайёгардидаи соҳаи тандурустӣ ёдовар шуда, аз табибони ноҳия хоҳиш намуд, ки дар ифои вазифаи ҷонии худ ва риояи қасами Гиппократ нисбат ба худ серталаб бошанд.
Раиси ноҳия Рустам Ҷўразода ба сохтмони бунгоҳҳои тиббӣ дар деҳаҳо, таъмин намудани ҳар як деҳа бо табибону мутахассисони соҳибкасб, тезонидани сохтмони бинои беморхонаи марказӣ, таъмиру тармими шуъбаҳо ва ҳуҷраҳои беморон, баланд бардоштани сатҳу сифати хизматрасонии тиббӣ, таъминот бо дастгоҳу таҷҳизоти муосири ташхисӣ, нашру паҳни маводи тарғиботӣ барои баланд бардоштани фарҳанги солимбахшии шаҳрвандон ва дигар масъалаҳо диққати махсус зоҳир намуд.