Суғд: Ба истироҳат фаро гирифтани 200 донишҷӯи фаъол

Душанбе, 03.02.2016. (АМИТ «Ховар»). — Бо ташаббуси мақомоти иҷроияи ҳокимияти давлатии вилояти Суғд барои 200 ҷавони фаъолу беҳтарини донишгоҳҳои олии вилояти Суғд дар Маркази солимгардонии кӯдакон, наврасон ва ҷавонони ба номи «20-солагии Истиқлолияти Тоҷикистон» лагери маърифативу солимгардони ташкил шуд.
Раёсатҳои кор бо занон ва оила, варзиш ва сайёҳии вилоят барои ташкили истироҳати 200 донишҷӯи беҳтарин чорабиниҳои маърифатию ахлоқӣ ва тарбиявиро гузарониданд. Аз ҷумла, лаҳзаҳои фарҳангӣ-фароғатӣ, намоиши филмҳои мустанад, гузаронидани ҳар гуна бозиҳои варзишӣ ва зеҳнӣ, суҳбат бо занони барӯманду собиқадор ва маҳфилҳои кадбонуӣ гузаронида шуданд.
Аз рӯи барнома Раёсати кор бо занон ва оилаи вилоят байни 100 донишҷӯдухтар суҳбату маҳфилҳои адабӣ бо иштироки шоираҳо, занони собиқадору фаъол ва рӯзгордида дар мавзӯъҳои «Нақш ва мақоми зан дар ҷомеа», «Фарзанд азиз, одобаш аз вай азизтар», «Оилаи солим-ҷомеаи солим» ва «Никоҳи хешутаборӣ ва оқибатҳои он» баргузор намуд.
Ҳамчунин байни ҷавондухтарон озмуни «Кадбонуи беҳтарин» гузаронида шуд, ки донишҷӯдухтарон тарзи омода намудани хӯроки миллӣ ва тайёр кардани ҳар гуна шириниҳову хӯришҳоро нишон доданд.