Қурғонтеппа: Соли равон филиали Донишгоҳи давлатии тиббии Тоҷикистон таъсис меёбад

Душанбе, 15.02.2016 (АМИТ «Ховар»).-Гурӯҳи кории мақомоти иҷроияи маҳаллии ҳокимияти давлатӣ дар шаҳри Қурғонтеппа таҳти роҳбарии муовини раиси шаҳр ва роҳбари ҲХДТ дар шаҳри Қурғонтеппа бобати фаҳмонидани муҳтавои нуктаҳои Паёми навбатии Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо кормандони беморхонаи клиникии вилояти Хатлон ба номи Б. Воҳидов вохӯрӣ баргузор намуд. -Дар Паёми навбатӣ Президенти Ҷумҳурии Тоҷикистон муҳтарам Эмомалӣ Раҳмон соҳаи иҷтимоиро яке аз соҳаҳои афзалиятнок ҳисобида, барои рушди босуботи он андешидани тадбирҳои заруриро таъкид намуд,- зикр намуданд аъзои гурӯҳи корӣ дар вохӯрӣ.
Бояд зикр намуд, ки дар ин Паём Президенти Ҷумҳурии Тоҷикистон муҳтарам Эмомалӣ Раҳмон нарасидани табибонро дар вилояти Хатлон таъкид намуда, ба таъсиси филиали Донишгоҳи давлатии тиббии Тоҷикистон дар шаҳри Қурғонтеппа супориш дод.
Табибони Беморхонаи клиникии вилояти Хатлон ба номи Б. Воҳидов ин хабарро бо хушнудӣ истиқбол намуда, ин иқдоми Президенти Ҷумҳурии Тоҷикистон муҳтарам Эмомалӣ Раҳмонро тадбири зарурӣ ва саривақтӣ барои рафъи мушкилоти соҳа арзёбӣ намуданд.